Assalomu alaykum, Mehmon!
Bosh sahifaga
Kirish

Yangiyer shahar hokimi va`dasidan qaytdimi: tadbirkorlar nimadan norozi?

Shu yilning 10 yanvar kuni Sirdaryo viloyati Yangiyer shahar dehqon bozori rekonstruksiya qilinishi munosabati bilan vujudga kelgan muammolar haqida videolavha e`lon qilingan edi. Unda do'konlari buzilgan mahalliy tadbirkorlar tovon pulini olish borasida muammolarga duch kelayotgani, ayrim tadbirkorlar esa, tovon pulidan voz kechgan holda, Yangiyer shahar dehqon bozorining qurilishida o'z hisoblaridan ishtirok etish taklifini ilgari surgan edi. 

Bizga ma`lum qilishlaricha, maqola e`lon qilinganidan so'ng, Sirdaryo viloyati hokimining birinchi o'rinbosari, viloyat prokurori Yangiyer shahriga borib, hokim va tadbirkorlar bilan uchrashuv o'tkazgan. Ikki tomonlama kelishuvga asosan mahalliy tadbirkorlar MChJ tashkil etib, nizom jamg'armasini shakllantiradigan bo'lishgan. Shundan keyin bozorning yarmini qurish bo'yicha loyiha ularga taqdim etilishi, tadbirkorlar qurilish me`yorlariga muvofiq ravishda bozorning o'z cheklariga tushgan qismini barpo qilishlari lozim edi. 

“Saytingizda ushbu bozor bilan bog'liq xabar chiqqanidan so'ng, Yangiyerga viloyat hokimining birinchi o'rinbosari, viloyat prokurori kelib, yig'ilish o'tkazishdi. Shahar hokimi bilan kelishuvga erishildi. Biz tovon puli olmaslik bo'yicha tilxat yozib, 13 tadbirkor birlashib, MChJ tashkil qildik. Uning balansiga 20ta do'konni kiritdik. 5 mlrd so'mlik nizom jamg'armasi tashkil etdik. Kelishuvga ishonib 100 tonna sement, armatura ham xarid qilib qo'ydik.

Barcha hujjatlar tayyor bo'lganidan so'ng, shahar hokimiyatidagi mutasaddilar hokim qaroriga ilova qilinadigan hujjatga imzo chekishdi. Birgina shahar hokimining imzosi qolgan, biroq u paysalga solmoqda. Dastavval, rozilik bildirib turgan Elyor Xo'jayev, endilikda, bozordagi boshqa do'kon egalari ham tovon puli olmasliklari uchun tilxat yozib berishlari kerakligini talab qilmoqda”, - deydi tadbirkorlardan biri Abdurashid aka. 

Ma`lum bo'lishicha, viloyat hokimligi, viloyat prokurori hamda savdo-sanoat palatasi viloyat boshqarmasi, soliq boshqarmasi tadbirkorlarning taklifini qo'llab-quvvatlamoqda. Yangiyer shahar hokimligidagi ayrim mutaxassislar ham tadbirkorlar ajoyib fikrni ilgari surgani, qolaversa tovon pulidan voz kechganlari ham shahar byudjyetiga anchagina yordam ekanini ta`kidlashdi. 

Qayd etish o'rinli, bozorni qayta qurish va rekonstruksiya qilish ishlari Prezidentning 2017 yil 27 martdagi PQ-2853-sonli qarori bilan bosh pudratchi “NBU–Bunyodkor” MChJga topshirilgan

Biroq uning 9-bandida “Quyidagilar: respublikaning qishloq joylaridagi dehqon bozorlari hududida zamonaviy savdo majmualari qurilishiga — O'zbekiston Respublikasi Tashqi iqtisodiy faoliyat milliy bankining mablag'lari, shaharlarda esa — tadbirkorlik sub`yektlarining o'z mablag'lari hamda tijorat banklarining kreditlari 2017 — 2019 yillar davrida dehqon bozorlarini rekonstruksiya qilish va ularning hududida zamonaviy savdo majmualari qurish dasturini amalga oshirishni moliyalashtirish manbalari etib belgilansin”, - deya ta`kidlanadi. Ayni qarorga taqdim etilgan 1-ilovaning Yangiyer shahriga doir qismida O'zbekiston Respublikasi Tashqi iqtisodiy faoliyat milliy bankining mablag'lari, tadbirkorlik sub`yektlarining o'z mablag'lari hamda tijorat banklarining kreditlari hisobiga qurilishi belgilab qo'yilgan.

Ammo negadir, prezident qarorida bosh pudratchi sifatida “NBU–Bunyodkor” MChJ belgilab qo'yilgan bo'lsa-da, Yangiyer shahri “Dehqon bozori”dagi qurilish va rekonstruksiya ishlarini subpudratchi “Ulug'bek Yangiyer Qurilish” MChJ olib bormoqda. Ammo biz necha marta bozorga borgan bo'lsak, qurilish ishlarining avjida ekaniga ko'zimiz tushmadi. Xususan, birinchi maqola chiqqan 10 yanvardan ikkinchi safarimizgacha 2 oy 15 kun o'tganiga qaramay, bozorning qurilish bo'layotgan hududida jiddiy o'zgarishlarni sezmadik.

Shaharning biz suhbatlashgan fuqarolari, qurilish ishlari bir boshlanib, bir to'xtab qolishini aytishdi. Savol tug'iladi: shunday vaziyatda, qurilish ishlarini jadal olib borishga shay turgan tadbirkorlar guruhiga bozorning bir qismini qurish ishlarini kelishilganidek topshirish maqsadga muvofiq emasmi? Bundan avvalo xalq, davlat, mahalliy hokimiyat, tadbirkorlarning o'zlari ham zarar emas, faqat foyda ko'rgan bo'lar edi, nazdimizda. Bundan tashqari, yangi bozor ham tezroq foydalanishga topshirilardi. 

Biz masalaga oydinlik kiritish maqsadida shahar hokimi bilan uchrashdik. Birinchi marotaba qisqagina og'zaki suhbatlashgan bo'lsak, ikkinchi gal uchrashuv salom-alikdan iborat bo'ldi, xolos. To'g'ri bunda, na hokim, na biz aybdor. Ikkala holatda ham o'zimizga bog'liq bo'lmagan sabablar tufayli intervyu olishning imkoni bo'lmadi. 

Shu munosabat bilan, KUN.UZ sayti Yangiyer shahar hokimligidan yuqoridagi holat bo'yicha, shuningdek shahar hokimligi va tadbirkorlar o'rtasidagi dastlabki kelishuv amalga oshishiga nima to'sqinlik qilayotgani, shahar hokimi Elyor Xo'jayev qarorga imzo qo'ymayotganining sababi nimadan iborat ekaniga doir batafsil izoh kutib qoladi.  
 

Bosh sahifaga
0 / 21

Rol.uz Universal Portal

Statok.netUzMasterS.Ru