Hi, Guest!
Home
Login

«Ikkichilar voqeasi» ortidan yana bir maktabda direktor va o'qituvchilar ishdan ketdi

Keyingi kunlarda internetda Toshkent viloyati Bekobod shahridagi 5-maktabning Muborak ismli o'qituvchisi tomonidan darsni o'zlashtirmagan 1-sinf o'quvchilarining peshonasiga ruchka bilan «2» raqamini katta qilib yozgani ko'rsatilgan surat tarqaldi.

Foto: Facebook

14 may kuni Bekobod shahri prokuraturasi Toshkent viloyati xalq ta`limi boshqarmasi bilan hamkorlikda ushbu holat yuzasidan tekshirish boshladi.

Xalq ta`limi vazirligi ushbu holatni o'rganib chiqqan.

Vazirlik matbuot xizmatining «Kun.uz»ga ma`lum qilishicha, voqea shu yilning may oyi boshida Bekobod shahridagi 5-sonli umumta`lim maktabining 1-«J» sinfida sodir bo'lgan. Toshkent viloyati xalq ta`limi boshqarmasi tomonidan muassasada xizmat tekshiruvi o'tkazilib, o'quvchilarning kamsitilishiga yo'l qo'ygani uchun barcha mas`ul xodimlarga tegishlicha chora ko'rilgan.

Xususan, muassasada o'quvchilarning huquqlari poymol etilishi, ularning qadr-qimmati kamsitilishiga sharoit yaratib bergani, maktabda nazoratni izdan chiqarib, ta`lim-tarbiya jarayonini qoniqarsiz holatga keltirgani, o'zining lavozim majburiyatlarini qo'pol ravishda buzgani uchun maktab direktori D.Babamuratova bilan tuzilgan mehnat shartnomasi bekor qilinib, egallab turgan lavozimidan ozod etilgan.

O'z vazifasiga mas`uliyatsizlik bilan yondashgani, qator xato va kamchiliklarga yo'l qo'ygani uchun maktab direktorining o'quv ishlari bo'yicha o'rinbosarlari H.Razzoqova, G.Baymatova, O.Abdullayeva, ma`naviy-ma`rifiy ishlar bo'yicha o'rinbosarlar I.Mo'minov, M.Ro'ziyeva hamda pedagogga xos bo'lmagan xatti-harakatlari, o'z o'quvchisining kamsitilishiga yo'l qo'ygani uchun boshlang'ich sinf o'qituvchilari S.Rahmonova hamda M.Hamdamova bilan tuzilgan mehnat shartnomalari bekor qilingan.

Shuningdek, o'z xizmat vazifasiga sovuqqonlik bilan qaragani, tasarrufidagi ta`lim muassasalarida o'quv jarayonlarini nazorat qilmagani uchun Bekobod shahar xalq ta`limi bo'limi mudiri M.Qo'zibayevga «hayfsan» berilgan, Bekobod shahar xalq ta`limi bo'limi ma`naviy-ma`rifiy tarbiya va bolalarning ijtimoiy himoyasi bo'yicha sho'`ba mudiri N.Musakova egallab turgan lavozimidan ozod etilgan.

Toshkent viloyati xalq ta`limi boshqarmasi boshlig'i Shukur Burxonov o'quvchilarning ota-onalari bilan uchrashib, ulardan bo'lgan voqea uchun uzr so'ragan.

«Mazkur holat tizimdagi barcha ta`lim muassasalarida pedagoglar, mahalla faollari va keng jamoatchilik ishtirokida muhokama qilindi. Voqea yuzasidan aniqlangan xato va kamchiliklarga huquqiy baho berish uchun tegishli tartibda huquqni muhofaza qilish organlariga ma`lumot kiritildi.

Xalq ta`limi vazirligi har bir o'quvchining bepul va sifatli umumiy o'rta ta`lim olishga bo'lgan konstitutsiyaviy huquqlari so'zsiz ta`minlanishiga ko'maklashadi va o'quvchi huquqlari buzilishining har qanday ko'rinishiga nisbatan qat`iy chora ko'radi. Shu o'rinda, vazirlik ota-onalar va jamoatchilikdan ta`lim-tarbiya jarayonlarida faol bo'lishni so'ragan holda hamkorlikka doim tayyorligini ma`lum qiladi», deyiladi Xalq ta`limi vazirligi matbuot xizmati xabarida.

Aprel oyida Xorazm viloyati, Urganch shahridagi Avtomobil yo'llari kasb-hunar kollejining biologiya fani o'qituvchisi o'quvchi oyoq kiyimi bilan kaltaklangani videosi tarqalgach, o'tkazilgan tekshiruvlar natijasida o'qituvchi ishdan ketgandi.

Home
0 / 17

Rol.uz Universal Portal

Statok.netUzMasterS.RuUptime по данным Ping-Admin.Ru - сервиса мониторинга доступности сайтов